Organizatorët e dasmave i kemi parë në shumë filma romantikë. Ata janë të zgjuar, të mirorganizuar, janë plot ide dhe ndihmojnë që dasma të jetë sa më perfekte. “Wedding Planners Albania” vjen si një risi në tregun shqiptar duke ofruar profesionalizëm dhe tendencat më të reja dhe moderne. Por, për këtë, ato flasin vetë në një intervistë për KULT. 

Botuar në Revisten Kult me 07/07/2012
Nga Dorina Talo

Prej pak kohësh keni nisur aktivitetin e organizimit të eventeve si dasma etj.
Është një eksperiencë që lindi si rrjedhojë e kërkesës së tregut, pasionit për të bukurën…?

Si një përrallë! Gjendemi pak kohë në treg, por prezenca jonë është dinjitoze. Edhe pse me hapa të vogla, ne fitojmë zemrën e miqve, të cilët na i besojnë detajet e dasmës së tyre…Dëshirojmë, së pari, të arsyetojmë emërtimin e këtij aktiviteti. “Wedding Planners Albania” është zgjedhur pas një eksperience tonën personale dhe duke qenë se ky emër në shqip ka një përkthim, i cili nuk e përfaqëson ekzaktësisht, vendosëm ta mbajmë kështu. Aftësia organizative dhe pasioni për të bukurën na bën të synojmë më të mirën, kënaqësia që u japim miqve tanë, e shton dëshirën tonë përditë.Kërkesa e pavetëdijshme e tregut për krijime cilësore dhe unike na hap dyert drejt suksesit dhe njerëzve, të cilët dinë ta vlerësojnë punën e dorës.

Çfarë ofroni më konkretisht me anë të asistencës suaj?

Çdokush për ne është unik. Ndaj çdokush trajtohet si unik. Do donim të ofronim akoma më shumë nëse njerëzit do të lejonin që dasmën e tyre ta organizonte një ‘wedding planner’. Është një risi në Shqipëri, pasi në këtë moment çiftet preferojnë të merren deri në detaj vetë me organizimin. Në realitet punësimi i një ‘wedding planner’, kursen kohë, para dhe lejon çiftin të jetë i qetë në mënyrë që të shijojë ditën e madhe. Ky është vizioni ynë.Aktualisht, ne ofrojmë asistencë në realizimin e ftesave dhe kaltolerive, konfeti, libra urimesh si për dasmë, ashtu edhe për pagëzime, por jo vetëm, sepse gama e shërbimeve shtohet, në varësi të kërkesave të secilit. Por, nuk mungon edhe informacioni, këshillat apo sugjerimet tona në çdo moment që ne diskutojmë me miqtë, të cilët kërkojnë shërbimet tona.

Sa e lehtë/vështirë është t’ua besosh njerëzve të tjerë organizimin e një dite kaq të rëndësishme?

Në ditët e sotme, jeta është shumë intensive. Njerëzit dhe sidomos çiftet e reja, por edhe ata që tashmë janë prindër, gjenden në një garë me kohën. Kur vjen momenti për të menduar për realizimin e një dasme apo një pagëzimi, ata gjenden para një vendimi, i cili në shumë raste shtyhet në kohë sepse pikërisht ata nuk gjejnë kohë për ta organizuar atë. Duke qenë se besimi nuk është shumë i lehtë të krijohet, nuk është e lehtë që t’i besohet dikujt tjetër organizimi i kësaj ditë, stacion në jetë. Tendencat tregojnë se shumë shpejt, këto evente të rëndësishme do duhet t’i besohen një profesionisti, duke evituar kështu humbjet si të kohës, por edhe të parave.

Kujt ia besoni realizimin e elementeve që ju krijoni?
Ato krijohen në bazë të disa standardeve apo në përshtatje me natyrën e gjithsecilit?

Vetes edhe stafit tonë, të cilët me shumë dashuri, krijojnë për miqtë që vijnë pranë nesh. Krijimet tona, bëhen me shumë dashuri dhe përkujdesje. Sepse ne e dimë se çfarë kuptimi ka kjo ditë e veçantë. Patjetër që çdo gjë që në krijojmë bazohet në një standard, por gjithmonë ato përshtaten edhe me natyrën e personave, duke shtuar elemente, të cilat përfaqësojnë gjithsecilin.

Përveç kurimit në detaje të elementeve kyç si ato që ju ofroni, një event kërkon ide dhe punë për një organizim më gjithëpërfshirës, si veshja, vendi, arredimi etj, etj.
Mendoni se “Wedding Planners Albania” mund ta përmbushë në një të nesërme këtë mision?

Siç e kemi përmendur edhe më sipër, vizioni ynë është që të mund të ofrojmë asistencë në gjetjen e të gjitha elementeve që kërkon një event për t`u realizuar. Disponimi i një liste të gjerë bashkëpunëtorësh, do jetë një pikë e fortë për të përmbushur detyrën tonë dhe për të plotësuar kërkesat e tregut.
Stilimi i fustaneve të nusërisë, por edhe veshjeve për aktorët e rëndësishëm të eventeve, të cilët duhet të jenë të shkëlqyeshëm atë ditë, është në listën e shërbimeve qe ne do kemi mundësi të ofrojmë në të ardhmen. Nuk themi jo tek asnjë sfidë që e ardhmja sjell.

Misioni ynë është të arrijmë të bëjmë të lumtur çdo individ, duke përshtatur shërbimet tona në karakterin unik të gjithsecilit.
E vetmja gjë që ata duhet të bëjnë është të vendosin, Ne do ta bëjmë realitet.

Nga eksperienca juaj e deritanishme, çfarë këshille do t’i jepnit çifteve që po planifikojnë të martohen, por edhe atyre që duan të realizojnë një event tjetër?

Së pari, i sugjerojmë që të mos e humbasin mundësinë që u jepet në jetë për të bërë ëndrrën, realitet. Dita e kurorëzimit të tyre, por edhe dita e pagëzimit të frytit të dashurisë së tyre, janë ditët më të rëndësishme në jetë. Festimi i këtyre ditëve janë dhurata që secili i bën vetes, si shpërblim për të gjitha vështirësitë dhe përpjekjet e rrugëtimit ndër vite.

Gjithashtu u themi të zgjedhin finesën, duke nisur që nga ftesa, sepse nga ajo nis gjithçka, ajo i përfaqëson si individë para syve të të ftuarve.

Siç thotë Robert Brault: “Shijoji gjërat e vogla, një ditë ato do të të kthejnë pas në kohë dhe atëherë do të kuptosh se ishin gjëra të mëdha”.